ಹರಿಗವನಗಳು - ೨

ನಿನ್ನ ನೆನಪಿನಲಿ ನಾ ಸತ್ತರು ಚಿಂತೆ ಇಲ್ಲ
ಗೆಳತಿ
ಕಾಯುತ್ತೇನೆ
ಮುಗಿಲಾಚೆಗು ಲೋಕವಿದೆ - ಹರಿ

ಮೋಡಗಳಿಲ್ಲದ ರಾತ್ರಿಯಲಿ
ಪೂರ್ಣ ಶಶಿಯ ಬೆಳದಿಂಗಳಿನಲಿ
ಬೇಸರವಾದಾಗ
ಒಂದು ಕ್ಷಣ
ನನ್ನನ್ನು ನೆನದರೆ ಸಾಕು - ಹರಿ

ಚಳಿಯಲ್ಲಿ ನಡುಗಿಸಿ
ಮಳೆಯಲ್ಲಿ ಮಿಂದಿಸಿ
ಬೇಸಿಗೆಯ ತಾಪಕ್ಕೆ
ತಳ್ಳಿದಳು ನನ್ನ ಗೆಳತಿ - ಹರಿ

ಪ್ರೀತಿಯ ಅದ್ಭುತವಾದ ಮಾಯೆಯಲಿ
ಸಿಲುಕಿ ನಾ ಈ ಲೋಕವನ್ನೇ ಮರೆತು
ಬೇರೊಂದು ಲೋಕದಲ್ಲಿ ಅಲೆಯುತ್ತಿದ್ದೇನೆ,
ಈಗಲೂ ನೀ ಎನ್ನ ನೆನೆಯುತ್ತ ಇರಬಹುದು
ಎನ್ನುವುದೊಂದೇ
ನಾ ಎನ್ನ ಮನಸ್ಸಿಗೆ ಹೇಳುತ್ತಿರುವ ಸಾಂತ್ವನ - ಹರಿ

ನನ್ನ ಹೆಸರ ನೆನೆಯ ಬೇಡ
ನೀ ನನ್ನ ನೆನೆಯಬೇಡ
ನೆನೆಯುವುದು ನನ್ನ ಕೆಲಸ
ನೆನೆದಾಗ ಬರುವುದು ನಿನ್ನ ಕೆಲಸ
ಬಂದರೂ ಬಾರದಂತಿರಬೇಡ
ಬಾರದ್ದಿದ್ದರು ಬಂದಂತಿರಬೇಡ
ನೆನಪುಗಳ ನೆನೆಯುವುದು
ಈ ಮನಕ್ಕೆ ಸಿಗುವ ಕಾಣಿಕೆ - ಹರಿ

ನೀ ನನ್ನ ಪ್ರೀತಿಸದ್ದಿದ್ದರು
ನಾ ಸತ್ತು ಮೌನವಾದರು
ನೀನೆ ಬೇಕು
ಇಲ್ಲದ್ದಿದ್ದರೆ........ - ಹರಿ

ನಿನ್ನ ನೆನಪುಗಳ ಹೊದಿಕೆ ಮಾಡಿ ಮಲಗಿದರೂ
ನಿದ್ದೆ ಬರಲಿಲ್ಲ - ಹರಿ

ಮೊದಲ ಪ್ರಯತ್ನ

ಬರವಣಿಗೆಯಲ್ಲಿ ನನ್ನ ಪ್ರಯತ್ನ, ಬರೆದದ್ದು 19ನೆ ವಯಸ್ಸಿನಲ್ಲಿ......
ಪ್ರೇರಣೆ - ನನ್ನ ಪ್ರೇಯಸಿ.....
ಕಾಲೇಜಿನ ಮೊದಲ ದಿನ ನಾನು ಮನಸಾರೆ ಮನಸ್ಸು ಸೋತ ದಿನ :-)

ಭಾವನೆಗಳು

ನನ್ನ ಮನದೊಳಗೆ ಹುದುಗಿರುವ ಭಾವನೆಗಳು
ಅವು ಬರಿ ಭಾವನೆಗಳಲ್ಲ

ನಿನ್ನ ಮೇಲಿರುವ ನನ್ನ ಪ್ರೀತಿಯ ಚಿಲುಮೆಗಳು
ಭಾವನೆಗಳು ನೂರಾರು ಇರಬಹುದು
ಆದರೆ ಪ್ರತಿಯೊಂದು ಭಾವನೆಯು ಸೂಸುತ್ತಿದೆ
ನನ್ನ ಪ್ರೀತಿಯ ಪರಿಮಳವನ್ನು

ನಾ ಪ್ರೀತಿಸುತ್ತಿದ್ದೇನೆ ನಿನ್ನನ್ನು
ಆದರೆ ವ್ಯಕ್ತ ಪಡಿಸಲು ಆಗುತ್ತಿಲ್ಲ ನನ್ನ ಮನದಾಳದ ಭಾವನೆಗಳನ್ನು
ನನ್ನ ಮನದಾಳದ ಭಾವನೆಗಳಿಗೆ ನೀನೆ ಕಾರಣ

ನಾ ನಿನ್ನನ್ನು ದೂಷಿಸುತ್ತಿಲ್ಲ
ಬದಲಾಗಿ ಉಪಕಾರಿಯಾಗಿದ್ದೇನೆ
ಏಕೆಂದರೆ
ಪ್ರೀತಿಯೆಂಬ ಮಧುರವಾದ ಭಾವನೆಯನ್ನು ಅನುಭವಿಸಲು
ನೀನೆ ಕಾರಣ

ನನ್ನ ಭಾವನೆಗಳಿಗೆ ಎಲ್ಲೆಯೆ ಇಲ್ಲ
ಅದು ಯಾವಾಗಲು ನಿನ್ನನ್ನು ಪಡೆಯಲು
ಯತ್ನಿಸುತ್ತಿರುತ್ತದೆ

ಭಾವನೆಗಳನ್ನು ವ್ಯಕ್ತಪಡಿಸಬಹುದು
ಆದರೆ
ಮನದಾಳದ ಪ್ರೀತಿಯನ್ನು ವ್ಯಕ್ತಪಡಿಸಲು ಆಗುತ್ತಿಲ್ಲ
ನನ್ನಿಂದ
ಇದು ನನ್ನ ತಪಲ್ಲ
ತಪ್ಪೆಲ್ಲ ನನ್ನ ಮನಸಿನದು

ನನ್ನ ಮನಸಿನ ಭಾವನೆಗಳು ಶಾಂತವಾಗಿವೆ
ಅದು ಹೊರ ಚಿಮ್ಮಿದರೆ ಮುಂಗಾರಿನಲಿ
ಭೋರ್ಗರೆವ ಸಮುದ್ರದಂತೆ ಹೊರ ಹೊಮ್ಮುತ್ತದೆ
ಆಗ ಪ್ರಳಯವಾದರೂ ಆಗಬಹುದು
ಇದರಿಂದ ನಿನಗೆ ನಷ್ಟವಾದೀತು

ಪ್ರೀತಿಯೆಂಬ ತೀವ್ರತೆಯು ನನ್ನ ಕಣ್ಣುಗಳಲ್ಲಿ ಇವೆ
ನನ್ನ ಪ್ರೀತಿಯ ಎಲ್ಲೆಯನ್ನು ನೋಡ ಬಯಸುವುದಾದರೆ
ನನ್ನ ಕಣ್ಣುಗಳಲ್ಲಿರುವ ತೀವ್ರತೆಯನ್ನು ಕಾಣು ನೀ

ನನ್ನ ಮನದ ಮಧುರವಾದ
ಪ್ರೀತಿಗೆ ನನ್ನ ಕಣ್ಣುಗಳೇ ಕನ್ನಡಿ

ನಿನ್ನ ಕಣ್ಣುಗಳನ್ನು ಬಣ್ಣಿಸಲು ಸಾಧ್ಯವಿಲ್ಲ
ಸಾಕು ನನಗೆ
ನನ್ನನ್ನು ಕವಿ ಮಾಡಿದ್ದಕ್ಕೆ - ಹರಿ.

ಎತ್ತಣ ಸಾಗುತಿಹೆವು?

ಎತ್ತಣ ಸಾಗುತಿಹುದೀ ಪಯಣ?
ಎತ್ತಣ ಬೀಗುತಿಹೆವು ನಾವು?

ಎತ್ತಣ ಸಾಗುತಿಹುದೀ ಬದುಕು?
ಎತ್ತಣ ಬೀಗುತಿಹುದೀ ಜೀವ?

ಕಾಣದ ದಾರಿಯಲಿ ಸಾಗುತಿಹೆವು ನಾವು.
ಕಂಡ ದಾರಿಯಲಿ ಬೀಗುತಿಹೆವು ನಾವು.

ಯಾವ ದಿಕ್ಕಿಗೆ ಈ ಜೀವನ?
ಯಾವ ದಿಶೆಗೆ ಈ ಪಯಣ?

ಕಾಣದ ದಾರಿಯಲಿ ಶೂನ್ಯದ ಕಡೆಗೋ?
ಕಂಡ ದಾರಿಯಲಿ ಅನಂತದ ಕಡೆಗೋ?

ಕಂಡ ಕನಸಿನ ಹುಡುಕಾಟದ ಕಡೆಗೋ?
ಕಾಣದ ನೆಲೆಯ ತಡಕಾಟದ ಕಡೆಗೋ?

ಸಾನಿಧ್ಯದ ತ್ಯಾಗದ ಕಡೆಗೋ?
ಸಾಮ್ರಾಜ್ಯದ ಮೋಹದ ಕಡೆಗೋ?

ಎತ್ತಣ ಸಾಗುತಿಹೆವು ನಾವು?
ಕಣ್ಣಿಗೆ ಬಟ್ಟೆ ಕಟ್ಟಿ ಬೀಗುತಿಹೆವು ನಾವು.

ಕವಲು ಒಡೆದಿರುವ ಹಲವು ದಾರಿಗಳಲಿ,
ಹುಡುಕಾಟವ ನಡೆಸುತಿಹೆವು ನಾವು.

ಜೀವನ ಎಂಬುದು ಸಾರ್ಥಕತೆಯ ಕಥೆಯೋ?
ಜೀವನ ಎಂಬುದು ವ್ಯರ್ಥದ ಭಾದೆಯೋ?

ಕತ್ತಲೆ ಇಂದ ಕಿರಣದ ಕಡೆಗೋ?
ಬೆತ್ತಲೆ ಇಂದ ಪಾವಿತ್ರ್ಯದ ಕಡೆಗೋ?

ಯಾವ ದಾರಿಯು ನನ್ನದು?
ಯಾವ ದಾರಿಯು ನಿನ್ನದು?

ದಾರಿಯ ಆಯ್ಕೆ ಯಾರದು?
ಅನಿವಾರ್ಯ ಯಾಕದು?

ಹುಟ್ಟಿನ ಕಡೆಗೆ ಪಯಣವೋ ?
ಸಾವಿನ ದವಡೆಗೆ ಆತುರತೆಯೋ?

ದಾಸನಿಂದ ದೇವರು

ನೀ ಬರುವುದನ್ನೇ ಕಾಯುತ್ತಿದ್ದೇನೆ,
ಎಷ್ಟೋ ಮಾತುಗಳು ಆಡದೆ ಗಂಟಲಿನಲ್ಲಿ
ಸಿಕ್ಕಿ ಕೆಮ್ಮುತ್ತಿದ್ದೇನೆ,
ಇನ್ನು ಕೆಲವು ನೆತ್ತಿಗೇರಿ,
ಬಿಕ್ಕಳಿಕೆ ಶುರುವಾಗಿದೆ.

ನೀ ಬಿಟ್ಟು ಹೋದ ಹಾದಿಯಲ್ಲೇ
ಕಾಯುತ್ತಿದ್ದೇನೆ,
ಕಣ್ಣು ಕೆಂಪಾಗಿ ನೀರು ಸುರಿದರೂ,
ಕಣ್ಣು ಮಿಟಿಕಿಸುತ್ತಿಲ್ಲ.

ಕುಂತ ಜಾಗದಲ್ಲೇ ಕುಂತು,
ಸುತ್ತ ಹುತ್ತ ಕಟ್ಟುತ್ತಿದೆ,
ಜನರು ಹಾಲು ಎರೆಯುತ್ತಿದ್ದಾರೆ
ನಿನ್ನ ದಾಸನಾಗಳು ಹೊರಟಿದ್ದ ನನಗೆ
ದೇವರ ಪಟ್ಟ ಬಂದಿದೆ - ಹರಿ

ನೀನಿಲ್ಲದೆ

ಒಮ್ಮೆ ಪ್ರೀತಿಸಿ ನೋಡಬೇಕ್ಕಿತ್ತು ನನ್ನ ಪ್ರೀತಿಯ ತೀವ್ರತೆಯ...
ನಿನ್ನ ಹೆಸರಾಗಿತ್ತು ನನ್ನ ಜೀವನ - ಹರಿ

ನಿನ್ನ ನೆನಪುಗಳ ಹಾವಳಿ ಜಾಸ್ತಿ ಆಗಿದೆ,
ಮುಸುಕು ಹಾಕಿ ಮಲಗಿದರೂ,
ನನ್ನನ್ನು ಕಾಡುತ್ತಿದೆ - ಹರಿ

ನಿನ್ನ ನೆನಪುಗಳ ಹೊದಿಕೆ ಮಾಡಿ
ಮಲಗಿದರು
ನಿದ್ದೆ ಬರಲ್ಲಿಲ್ಲ - ಹರಿ

ಹರಿ ನಾಮ ಸ್ಮರಣೆ ಇಂದ,
ಹರಿಪಾದ ಸಿಗುವುದಾದರೆ,
ನಾ ಎನ್ನ ಪ್ರೇಯಸಿಯ ಸ್ಮರಿಸುವೆ - ಹರಿ

ಮಿಥ್ಯವನುಡಿಯಲಾರೆ ಎನ್ನ ಪ್ರೇಯಸಿಗೆ,
ಅವಳು ನನ್ನ ಅಂತರಂಗದ ಕವಿತೆ - ಹರಿ

ಪ್ರೀತಿಸಿದಕ್ಕೆ ನೀನಂತು ಸಿಗಲ್ಲಿಲ್ಲ,
ಸಿಕ್ಕಿದ್ದು ಒಡೆದ ಮನಸ್ಸು,
ಬಿಳಿ ಹಾಳೆ,
ಲೇಖಣಿ,
ಮತ್ತೆ ಬಿಸಿ ನೆತ್ತರು - ಹರಿ

ನೀ ನನ್ನ ಬಿಟ್ಟು ಹೋದರು,
ನನಗೆ ಒಂಟಿತನ ಕಾಡಲಿಲ್ಲ,
ಮೂರು ಹೊತ್ತು ನಿನ್ನ ನೆನಪುಗಳ
ಮೂಟೆ ಹೊತ್ತುಕೊಂಡು ತಿರುಗುತ್ತಿದ್ದೇನೆ - ಹರಿ

ಕಲೆ

ನಿನ್ನ ಪ್ರೀತಿಯ ಒಲೆ ಮೇಲೆ
ನನ್ನ ಮನಸ್ಸೆಂಬ ಪಾತ್ರೆಯನಿಟ್ಟು
ಅದರೊಳಗೆ ಭಾವನೆಗಳ ತುಂಬಿಸಿದೆ.

ಬೆಂಕಿ ಜೋರಾಗಿ, ಜ್ವಾಲೆಯಾಗಿ,
ಭಾವನೆಗಳ ಕುದಿಸಿತು.
ಕುದ್ದ ಭಾವನೆಗಳು ಉಕ್ಕಿ ಚೆಲ್ಲಬೇಕಿತ್ತು,

ಹಾಗಾಗದೆ, ಇಂಗಿಹೋಗಿ,
ತಳದಲ್ಲೆ ಕಪ್ಪು ಕಟ್ಟಿಕೊಂಡು,
ಎಷ್ಟು ತಿಕ್ಕಿದರೂ ಮಾಸದ ಕಲೆಯಾಗಿ ಉಳಿದುಕೊಂಡಿದೆ - ಹರಿ

ಎಂದು ಬರುವೆ

ಡಿಗ್ರಿ ಓದಲು ಯುವರಾಜಸ್ ಗೆ ಸೇರಿದಾಗ ನನ್ನನ್ನು ಸೆಳೆದ ಹುಡುಗಿಗೆ ಬರೆದ ಪ್ರಥಮ ಪ್ರೇಮಕವಿತೆ

ನೀ ಎಂದು ಬರುವೆ ಎನ್ನ ಬಾಳಿಗೆ
ನಾ ಕಾಯುತ್ತಿರುವೆ ನಿನ್ನ ಒಲವಿಗೆ

ನಿನ್ನ ನೆನಪುಗಳ ನಕ್ಷತ್ರಗಳ ಎಣಿಸುತ್ತಿರುವೆ
ಪದೇ ಪದೇ ಆಕಾಶದಲ್ಲಿ ಬೆಳಗುತ್ತಿರುವ ಚಂದ್ರನನ್ನೆ ನೋಡುತ್ತಿರುವೆ

ಪ್ರೀತಿ ಎಂಬ ಬೆಳಕನ್ನು ಬೀರು ನೀ
ಎನ್ನ ಜೀವನವ ಸಾರ್ಥಕಗೊಳಿಸು ನೀ

ನಿನ್ನನ್ನು ನೋಡಲು ಮನವು ಹಂಬಲಿಸುತ್ತಿದೆ
ನಿನ್ನನ್ನು ಪಡೆಯಲು ಹಾತೊರೆಯುತ್ತಿದೆ

ನೀ ಎಂದು ಬರುವೆ ಎನ್ನ ಒಲವೆ
ತಿಳಿಸುವೆಯ ಎನ್ನ ಮನದಾಳದ ಸಿಹಿ ನೋವೆ

ಕಾಯುತ್ತಿದ್ದೇನೆ ಎನ್ನ ಮಾನವ ಸಮಾಧಾನಗೊಳಿಸಿ
ನೀ ಬಂದೆ ಬರುವೆ ಎಂಬ ಆಶ್ವಾಸನೆಯ ಹುಟ್ಟಿಸಿ

ಬಂದರು ಬಾರದಂತಿರಬೇಡ
ಬಾರದಿದ್ದರೂ ಬಂದಂತಿರಬೇಡ
ಇದು ನಿನ್ನ ಕೆಲಸವಲ್ಲ
ಇದೇನಿದ್ದರೂ ನಿನ್ನ ನೆನಪುಗಳ ಕೆಲಸ

ನಿನ್ನನ್ನೇ ಸದಾ ನೆನೆಯುತ್ತಿರುತ್ತೇನೆ
ನಿನ್ನನ್ನೇ ಸದಾ ಪೂಜಿಸುತ್ತಿರುತ್ತೇನೆ
ನಿನ್ನನ್ನೇ ಸದಾ ಕಾಯುತ್ತಿರುತ್ತೇನೆ

ಎನ್ನ ಪ್ರೀತಿಸದ್ದಿದ್ದರು ಸರಿಯೆ
ಬಂದು ಹೋಗುವೆಯ ಎನ್ನ ಒಲವಿನ ಸಿರಿಯೆ

ಪ್ರೀತಿಸಲು ನಾ ನಿನ್ನ ಕಾಡುವುದಿಲ್ಲ
ಪ್ರೀತಿಸಲು ನಾ ನಿನ್ನ ಬೇಡುವುದಿಲ್ಲ
ಪ್ರೀತಿಸಲು ನಾ ನಿನ್ನ ಆಜ್ಞಾಪಿಸುವುದಿಲ್ಲ
ಪ್ರೀತಿಸಲು ನಾ ನಿನ್ನ ಅಪೇಕ್ಷಿಸುವುದಿಲ್ಲ
ಪ್ರೀತಿಸಲು ನಾ ನಿನ್ನ ಆಕ್ಷೇಪಿಸುವುದಿಲ್ಲ

ಪ್ರೀತಿಸಲು ಕಾರಣ ಬೇಕಿಲ್ಲ
ಪ್ರೀತಿಸುವ ಮನಸಿದ್ದರೆ ಸಾಕು - ಹರಿ